YMA hi kan ram tan rotling a ni - Chief Minister

Chief minister Lalduhoma chuan nimin khan Khawzawl Vengthar YMA Hall-ah Khawzawl Sub Headquarters YMA Conference vawi 2-na hmanpuiin, YMA member-te chu khawtlang leh ram nuam siam tura thawhpuiah a sawm a, YMA hi kan tan ram rotling a ni," a ti.

Lalduhoma chuan, YMA member-te chu khawtlang nuam leh ralmuang siam zel tura fuihin, kawng tinrenga sorkar thawhpui turin a sawm a, "Mizoten YMA kan nei hi kan nihlawh hle a, YMA anga mi zawng zawng huikhawm a, khawtlang ṭhuiphui thei pawl hi ram dangah an awm ka ring lo hial. Chuvangin, YMA hi kan tan ram rotling a ni," a ti a; ruihhlo do kawnga YMA hmalaknate chhuanawm a tih thu a sawi.

YMA hi Zo nun ze mawi tinrengte chhawm nunga, ṭhangtharte hnena zirtirtu a nih thu sawiin Lalduhoma chuan, "Tun hnaiah Mizoramin khualzin kan ngah hle a, min rawn tlawhtuten min fak fona pakhat chu kan Zo nun ze mawi tak tak an rawn hmuhte hi a ni. Nghahloh Dawr ringawt pawh hian an thinlungah thu a sawi nasa em em a, tunah chuan Zo nun ze mawi hi khualzinte hîp thei khawpa mihring nun mawi a ni ṭan ta. Ka zain i uar deuh deuh ang u," a ti.

Chief Minister chuan Mizoram khawchhak lam hian thlai an thar tam thu sawiin, "Mi taima in tam tihna a ni. Hma in sawn zel theih nan ruahmanna hrang hrang kan siam," a ti a, khawchhak lam bial zawng zawngte inhmanṭawm turin Cham-phai leh a chhehvelah sawhthing sawngbawlna din a nih dawn thu a sawi.

Conference vantlang inkhawm hi vice president Vanlalsawma Colney-in a kaihruai a; CYMA general secretary Prof. Malsawmliana'n YMA kumpuan 'Ruihhlo Do' hmangin thu a sawi. 'Rualtin khumtu YMA' tih hla phuahtu V Thangzama sunna hun an hmang bawk. Khawzawl Sub Hqr. huam chhungah hian Group YMA pali, Branch 42 leh member 19,899 an awm mek a ni.