Sikula sem tur electronic hmanrua vailiam

School Education department leh NIELIT Aizawl ṭangkawp chuan Ministry of Electronics & Information Technology hnuaia Students Advancing Mindsets in AI, Robotics, Technology & Digital Hardware (SAMARTH) kaltlangin sikul 12 hnenah electronic hmanrua an sem a; nimin khan School Education director Angela Zothanpuii'n NIELIT Aizawl kawt aṭangin sikulte hnena sem turin a vailiam.

Angela Zothanpuii chuan, SAMARTH project zirlaite zinga thiamna inthlauhna tihbo nana duan a nih thu a sawi a, "NIELIT hmalakna hi a lawmawm hle a, kum 2025-26 chhung khan zirlai 1,100-in zirtirna an dawng tawh a, kum 2028 thleng kalpui tur niin, kum tin zirlai 4,950 zirtir tum a ni a, sikul pakhatah zirlai 200 thleng zirtirna pek theih a ni ang. DEO hmalaknain sikul hrang hrang thlan tawhte tan hian hmanrua (kit) pek an ni dawn," a ti a; Govt. Comprehensive Middle School-ah phei chuan CSR hmanga din 'AI-competence lab' hawn thuai tum a nih thu a sawi.

Mizoram chu ziak leh chhiar thiam vekna (fully literate) state a nih tawh thu sawiin Education Director chuan, "Hetah hian duhtawk mai loin, fully digital literate state ni turin hmalakna tur tam tak kan la nei a, NIELIT Aizawl nen ṭangkawpin fully digital literate state ni thei turin hma kan lakho theih ka beisei," a ti bawk.

SAMARTH hi hmarchhak state pariatah Ministry of Electronics & Information Technology chuan pilot project angin a kalpui a, a hlawhtlin chuan national level-a kalpui tum a ni. Mizoramah chuan Phase-I (2025-26) khan sikul 12-a pawl 6-12 zirlai 1,100 hnenah NIELIT Aizawla mithiamten artificial intelligence (AI) bakah electronic hmanrua chi hrang hrang hman dan an zirtir a ni.

He scheme hnuaiah hian 'Training on AI, robotics, technology, digital hardware & cyber security' te, 'One day awareness workshop on cyber security in PM Shri Schools' te, 'Training of faculty members of each school'-te a awm a; nimin khan Phase-I hnuaia training neih tawhna sikul 12 - Dinthar M/S-I, Edenthar M/S, Chawlhhmun M/S, Salem M/S, PC Girls School, Govt. Comprehensive M/S, Upper Republic M/S, Bawngkawn M/S-II, Chhinga Veng M/S, RKM M/S, Govt Tej Singh M/S leh Goodwill HSS-te hnenah SAMARTH kaltlang hian zirlaite tan Do-It-Yourself (DIY) hmanrua (tool kit) leh sikul tan major kit-te sem a ni.