Foundational Learning Study buatsaih

Mizorama district 11 aṭanga thlan sikul 118-ah nimin khan Foundational Learning Study (FLS) 2025-26 buatsaih a ni a; pawl 4 zirlai 1,214-ten FLS hi chhangin, sikul thlan bik 118-te hi English medium sikul 60 leh Mizo medium sikul 58 an ni.

FLS hi national level-ah chuan PARAKH, NCERT-in kengkawhin, state leh UT level-ah chuan SCERT, DIET leh Samagra Shiksha-ten an kengkawh a; National Education Policy (NEP) 2020 chuan kum 2026–27 hmain rampuma pawl 3 zirlai naupang zawng zawngten foundational literacy and numeracy a nei ngei tur a ni a tih angin Ministry of Education chuan July, 2021 khan NIPUN Bharat Mission dinin, a tihlawhtling tur leh kengkawh turin March, 2022 khan NCERT kutah a dah.

March 23–26, 2022 khan India rampuma sikul 10,000 aṭangin pawl 3 zirlai naupang 86,000-ten FLS hmasa ber an lo chhang tawh a; Mizoram chuan foundational literacy-ah 59 leh foundational numeracy-ah 49 score-in kumin survey-ah hian hei aia score sang neih theih beisei a ni.

FLS hian a tum ber chu naupangin chhiar an thiam dan (oral reading fluency) chin leh numbar an thiam dan (numeracy skill) chin enfiah a ni a; FLS hmasa zawk (FLS 2022) kha baseline assessment angin paper leh pen (OMR-based) hmanga chhan tir an ni a, FLS 2026 erawh hi chu digital platform-ah tablet hmanga chhan tir an ni thung.

FLS 2026 result hi Performance Grading Index (PGI) 2.0-ah sengluh tur niin, state leh UT-te Education-a an dinhmun leh rank teh nana hman a nih tawh dawn bawk avangin a pawimawh hle a; nimina FLS 2026 hi Samagra Shiksha, Himachal Pradesh national level trainer-cum-observer Bobita Thakur leh SCERT joint director Dr Lalduhawmi Thomte, FLS 2026 state level coordinator-te kaihhruaina hnuaiah kalpui a ni.