Union Minister-in Khawzawla sorkar hmalaknate a tlawh

Union minister of state for Consumer Affairs, Food And Public Distribution Nimuben Jayantibhai Bambhaniya chuan nimin khan Mizoram sorkar hotute nen Khawzawl chhunga sorkar hmun pawimawh leh hmalakna hmun hrang hrangte a tlawh.

Nimuben Jayantibhai Bambhaniya hian national highway 6 tlawh hmasa berin, NHIDCL hotute chu highway an sak chhung leh enkawl chhung tur te a zawt a, uluk taka kawng siam leh enkawl hna thawk zel turin a a chah. Chumi hnuah KVK Khawzawl a tlawh a, exhibition stall ama puala an lo buatsaih chu lawmawm a tih thu leh lian tham zawk leh sikul naupang pawhin an chhim theih tura buatsaih ni thei a duhthu a sawi. KVK hmalakna hrang hrang tomato, alu leh nihawi te tha a tih thu sawiin, an hmalakna hnuaia kuthnathawktu mi 5 laiin national award an dawng thei chu lawmawm a ti a, office leh a chhehvel fai taka an enkawl dan fakawm a ti h thu a sawi bawk.

Kawnzara Public Distri-bution System godown leh Electric Veng-a fair price shop-te tlawh lehin, beneficiary-te nen an inkawm. Ration buhfai inchhek khawl dante a zawt a, buhfai sem a hun tak leh dik taka kalpui zel turin a chah. Khawzawl District Hospital-ah department hrang hrang a tlawh kual a, damdawi-in pharmacy-ah Jan Aushadhi kalpui a ni em tih zawtin, license apply mek a nih thu thawktute'n an hrilh. Ayushman Bharat Health infrastructure mission (PM ABHIM) hnuaia sak (Integrated Public Health Laboratory (IPHL) a tlawh a, serological leh biochemical test chi hrang hrang tih ve theih a nih thu hrilh a ni bawk. Damdawi in verandah leh compound chhuat chu siamṭhat ni thei se a duh thu a sawi Union MoS chuan a sawi.

Electric Veng Anganwadi Centre leh Khawzawl district chhunga Samagra Siksha hnuaia primary school awmchhun Little Flower Primary School-te tlawhin, sikul zirtirtu leh naupangte nen inkawmna hun an hmang. Harsatna an neihte zawtin, an harsatnate sutkiana naupangte tan zirna in nuam leh changtlung tak siam chu a ngaihpawimawh hle thu a sawi.