Chhiarpui 2027 thawh 1-na zawh a ni; Self enumeration-ah chhungkua 12,655

India ram chhiarpui neih chhoh mekah Mizoramah a thawh khatna zawh a ni a, mahnia inziah luhna (self enumeration)-ah Mizorama chhungkua 12,655 an inziak lut.

Directorate of Census Operation, Mizoram hotute chuan nimin khan Aizawl Press Club-ah thuthar thehdarhtute kâwmin, chhiarpui thawh khatna neih dan tlangpui an puang a ni.

Census Operation director Vinod P Kavle chuan, census first phase chu April 1, 2026 ṭan a nih thu sawiin, "Tunah hian first phase zawh a ni tawh a, Mizorama chhungkaw tin hmaih awm loin ziah luh an ni. Self enumeration-ah chhungkua 12,655 an inziak lut a, mahnia inziak lut zat hi state dangte ngaihtuahin a ṭha hle," a ti.

Vinod P Kavle chuan, Mizorama chhiarpui thawh khatna chu 100%-in a hlawhtling tih sawiin, "Mipuite'n min thawhpui ṭha em em a, chu chu kan hlawhtlin theih chhan a ni," a ti a; Mizoram mipui leh chhiarpui buaipuitu zawng zawng chungah an lawm thu sawiin, Mizoram sorkar leh General Administration Department te nen an thawhhona a ṭha thu a sawi.

Chhiarpui 2027 hi thawh hniha kalpui a ni a; a thawh khatnaa houselisting & house census chu April 1, 2026-ah ṭan a ni. April 1-15 chhungin self enumeration hun hawn a ni a, April 16 - May 15 chhungin houselisting & housing census tih a ni. Chhiarpui thawh hnihna - population enume-ration chu February 2027-ah ṭan a ni ang.