Sorkarin ruihhlo ngaite chhawmdawl a ngai pawimawh - Social Welfare Minister

Social Welfare, Women & Child Development Department (SWWCD) minister Lalrinpuii chuan nimin khan Hulhliap Short Stay Centre (SSC) aṭanga chhuakte tana thiam thil zirna buatsaih chu IPR Lianchhiari Rûn-ah a khar a; zir chhuakte hnenah certificate hlanin, "Sorkar chuan ruihhlo ngaite chhawmdawl hi a ngaipawimawh a, an hmasawnna tur atan dawmkàn zel a tum," a ti.

Lalrinpuii chuan, Hulhliap SSC aṭanga chhuakte tana thiam thil zirna programme aṭanga zir chhuakte chu a lawmpui thu a sawi a, "In thiamnate hi tipung zel ula, internet khawvela cheng kan nih tawh avangin social media hmangi in thiam thilte in phochhuah thiam a pawimawh. Sorkar chuan ruihhlo ngaite chhawmdawl hi a ngaipawimawh a, an hmasawnna tur atan dawmkàn zel a tum," a ti a; midangte nena thawhho thiamna, rinawmna leh taimakna nen hmalam pan zel turin a chah.

Kharna inkhawmah hian SWWCD secretary Lalzarmawii, MYC Chairman & Hulhliap Core Committee member Malsawmzuala Ralte, SWWCD additional secretary Lalnunhlua te pawhin thu an sawi a; tarlan danin, Hulhliap SSC - Aftercare, Skill Training & Handholding course hi May 4-15 thleng khan neih niin, training-ah hian assistant electrician (batch 5-na), aluminium fabrication (batch 4-na) leh basic food processing (batch 3-na)-ahte tarining buatsaih a ni.