NFSA-a Mizoram quota tipung turin Chhanzova'n Union Minister a ngen

18th May, 2026

Food, Civil Supplies & Consumer Affairs department chuan May 16, Inrinni zan khan Mizorama rawn zin Union Consumer Affairs, Food & Public Distribution minister of state Nimuben Jayantibhai Bambhaniya pualin Aijal Club-ah zanriah an buatsaih. FCSCA minister B Lalchhanzova chuan, National Food Security Act (NFSA)-a Mizoram quota tipung turin Union Minister a ngen.

Nimuben Jayantibhai Bambhaniya chuan, Mizoram a tlawh chhan chu, state-in harsatna a neihte zir a, a ṭul anga chingfel turin a nih thu a sawi a, "Prime minister Narendra Modi hruaina hnuaiah mi vbc 81-in a thlawnin ration an dawng reng a, hei hi Europe rama mihring awm zat aia tam a nih bakah, khawvel puma ei leh bar khamkhawp inngaihtuahsakna (food security program) lian ber a ni," a ti.

Prime Minister-in 'Food for All' (mi zawng zawng tan chaw) a ngaih pawimawh thu sawiin Bambhaniya chuan, "Mizoramah pawh mi tinin eikhawp hnianghnar an neih reng theih nan theihtawp kan chhuah dawn. Hmarchhak bialah fûr ruahtui a tam avangin inkalpawhna kawngpui a chhe fo a, hmarchhak state-te hnenah fûr thlen hmain thla thum daih ration pek lâwk a nih theih nan ṭanpui ka inhuam reng," a ti a; FCSCA department hmalakna leh hlawhtlinnate fakin, e-KYC, EPOS leh SMART PDS te chuan mi tam tak a puih thu a sawi.

FCSCA minister B Lalchhanzova chuan, Mizoram eikhawp a awm reng theihna tura sorkar laipui leh Food Corporation of India te hmalaknaah a lawm thu sawiin, "Mizoram pawhin sorkar laipui nena thawh dunna ṭha tak a neih zel a, mi tin chanvo tur bothlau a awm loh nan nasa lehzualin ṭan kan la dawn," a ti. Supply Minister hian Mizorama mi zawng zawngah chaw khawpkham a thlen ngei theih nan NFSA (ration card eng leh pawl)-a Mizoram quota tipung turin Union Minister a ngen a ni.

Inkawmhonaah hian FCSCA secretary Ravi Dadhich chuan FCSCA department dinhmun leh hmalaknate a sawi a; FCI general manager (NEF Region) Sandeep Deora-a'n Mizoram tana food supply leh warehousing lama hma an lak dan, harsatna leh dinhmunte a tarlang bawk.