KHAWTHLIR

Thisen pe

May 16, Inrinni khan Civil Hospital, Aizawl tan YMA, Ramthar Veng Branch chuan an branch golden jubilee pualin thisen unit 82 an pe a, petute mipa 71 leh hmeichhia 11 an ni a; Chakma Students Union, Aizawl pawhin blood bank-ah unit 13 an pe. Inrinni vek khan KṬP, Baktawng Bial chuan ZMCH tan thisen unit 62 pein, petute mipa 47 leh hmeichhia 15 an ni a; KṬP, Rangvamual Branch pawhin Synod Hospital tan unit 10 an pe bawk.

Tukverh aṭangin nula a tlahlum

Lalramchhani (31) d/o Kaprothanga, Dungtlang chu May 15, Zirtawpni zan dar 12 vel khan Bawngkawn South-a an chenna in tukverh aṭangin a tla a, damdawi-in panpui ni mah se, a hliam tuar loin a thi. Lalramchhani hi Doordarshan Kendra, Aizawlah junior technical assistant a ni a, Bawngkawnah a unaute nen in luahin an awm a; an khua Dungtlangah vui a ni.

Heroin man

Champhaia Excise & Narcotics mite chuan May 16, Inrinni zing dar 9 khan Champhai leh Zote inkara Tuipui leiah taxi MZ-04 B-1607 aṭangin heroin gram 327.87 (hawng 28) an man. Ruihhlo neitua puh Thangmuanzova (32) leh Tinngaihliana (26), Ngúr khua ve ve nia inchhal an man bawk.

UPC-in pawi an ti

UPC (NEI) chuan thuchhuah siamin, May 13, 2026-a Kangpokpi district, Manipur-a Thadou Baptist Association hruaitute lambuna kah hlum an ni chu pawi an tih thu leh chhiat tâwk chhungkuate an tawrhpui thu an tarlang a, "Hetiang tualthahna rapthlak tak hi tun hnuah thleng tawh lo se kan duh tak zet," an ti.

Detonator man

Assam Rifles sipaite chuan May 16, Inrinni khan Bawngkawna lirthei pakhat an endiknaah gelatin tihpuahna detonator 1,200 an man a, a kaihhnawihah mi pakhat an man nghal. Detonator leh a neitua puh hi Bawngkawn Police Station-ah an hlan a ni.