Speaker-in Hmar Martarte Ni a hmanpui

May 16, Inrinni khan Chura-chandpur Saikawt khelmual, Manipur-ah Hmar Martarte Ni vawi 36-na hman a ni a, Assembly speaker Lalbiakzama'n a hmanpui.

Hmar Martarte Ni hmanaah hian Lunglei North bialtu MLA V Malsawmtluanga leh Sinlung Hills Council chief executive member Ricky Lalremsanga te, Hmar Inpui hruaitu te, Hmartob hruaitu leh martar chhungkuate an tel.

Assembly Speaker chuan, Hmar hnam tana martarte inhlanna chu hriat reng tlak a nih thu sawiin, "Martarte thisen hian hnam nunna, zahawmna leh inpumkhatna a siam. Ram leh hnam humhalhna atan an nunna hlantu martarte zahna chibai ka bûk a, an inhlanna chu thuin sawi kim theih a ni lo," a ti a; martarte chu hnam ro hlu an nih thu a sawi.

Lalbiakzama chuan, Hmar hnam leh Mizo inzawmna a pawimawhna sawiin, "Hmar hruaitute leh organization-te'n Mizo/Zo inpumkhatna an ngai pawimawh hi a lawmawm. Manipur-a Hmar organization-ten Mizo/Zo identity reaffirmation an tih chu Zo hnahthlakte inpumkhatna leh hnam nunphung humhalhna kawngah thil pawimawh tak a ni," a ti.

Mizoram sorkar leh HPC-D inkara remna thuthlung tluantling siam a ni tawh chu lawmawm a tih thu sawiin Speaker chuan, "April 30, 2026-a HPC-D ten ralthuam an tun kha Mizorama remna leh muanna dinnghehna tura hmasawnna pawimawh a ni," a ti a; inremna hian inpumkhatna leh hmasawnna a tihchak dawn thu a sawi.

Assembly Speaker chuan Manipur-a chi leh chi inkara buaina chungchangah sawiin, "Zofa unaute'n harsatna leh tawhna nasa tak an hmachhawn mek hi a lungchhiatthlak. Ṭawng hrang leh identity hrang nei ni mah ila, Mizo/Zo identity hian min khung khawm vek tih i hria ang u," a ti a; inpumkhatna leh inunauna vawng nung zel tur leh mahni hnam nihna leh nunphung vawng chunga inpumkhat zel turin mipui a chah.