Union Minister-in Khawzawl dist a tlawh

Union Consumer Affairs, Food and Public Distribution minister of state Nimuben Jayantibhai Bambhaniya chuan May 15, 2026 khan Khawzawl tlawhin, May 16, Inrinni khan Chawngtlai a tlawh leh a; sorkar hotute a kawm bakah, sorkar hmunhmate leh mipuiin hna an thawhna hmunte a fang.

Nimuben Jayantibhai Bambhaniya hi Khawzawl DC conference hall-a sorkar hotute nen an inkâwm a; sorkar laipuiin India hmarchhak state-te a ngaih pawimawh thu leh hmasawnna ruhrel din kawngah leh mipuite'n hamṭhatna an dawn theih nan chak takin hmalak zel a tum thu a sawi a, "Sorkar scheme hnuaiah loneitu tam zawkin hmaṭhatna an dawn theih nan hmalak ni se, hemi atan hian inhrilhfiahna tam zawk neih a pawimawh a, ram hmasawnna turin ṭhalaite an pawimawh," a ti.

Union Minister hian Chawngtlaia Handloom Training Centre leh PMAY-G hnuaia in sakte May 16 khan a tlawh. Chawngtlaia self-help group member-te nen VC House-ah an inkâwm a, Handloom Training Centre aṭanga puantahte chu zau zawka pho lan ni se ṭha a tih thu a sawi.

Nimuben Jayantibhai Bambhaniya hian PMAY-G hnuaia in sa zo tawh chhungkaw pahnih a tlawh a, sorkar laipui scheme hmang ṭangkaia in an din thei chu a lawmpui thu a sawi. Sorkar laipuiin hmeichhia, ṭhalai, loneitute leh mi harsa zawkte chawikanna leh tihhmasawn a ngaih pawimawh thu a sawi bawk.