Chhùl hmáwr cancer chungchang sawiho

Health & Family Welfare minister Lalrinpuii hoin May 15, 2026 khan a pisaah University of Melbourne Prof. Julia Brotherton leh research assistant Maleeha Ashfaq te, Christian Medical College, Vellore aṭangin Dr Anu Oommen leh SHE-CAN Project Mizoram hotute'n chhùl hmáwr (cervical) cancer chungchang an sawiho.

Mithiamte chuan, chhûl hmâwr cancer chu mahnia inendikna hmanrua (self-testing kit) a awm thu an sawi a; Mamit district-a khaw paliah zirchianna neiin, hmeichhia kum 30-49 inkarte chu mahnia inenfiah turin swab pek an nih thu leh, an sample-te chu ZMCH Laboratory-ah endik tura pek leh ṭhin a nih thu an sawi a ni.

Lalrinpuii chuan, Mizorama cancer tam chhan zirchianna kalpui tum mek a nih thu leh, mahnia inendik theihna chu hmeichhe tam zawkin an hman ṭangkai ngei theih a duh thu a sawi.

Mithiamte tarlan danin, an zirchian-naah hian hmeichhia 500 chuang endik a ni a, natna lang chhuak lem lo, cancer inṭan thei tur dinhmuna ding mi eng emaw zat hmuh chhuah niin, a ṭul angin enkawlna nghal an ni. Mi 500 chuang zinga pathum chu cancer ṭan tir (pre-cancer) an ni tih hmuh chhuah a ni a, Mizoram State Cancer Institute, Zemabawkah enkawl nghal an ni.