CM Duhoma leh Union Minister an inkâwm; Mizoram buhfai tihpun dan tur an sawi dûn

Union Consumer Affairs, Food & Public Distribution minister of state Nimuben Jayantibhai Bambhaniya leh chief minister Lalduhoma te chu nimin Chief Minister’s Office-ah an inkâwm a; Chief Minister chuan, Mizoram tana buhfai pek zat tipung turin a ngen.

CM Lalduhoma chuan, Food Corporation of India (FCI) aṭanga Open Market Sales Scheme (OMSS) leh National Food Security Act (NFSA) hnuaia Mizoram tana buhfai pek zat tihpunsak turin Union Minister a ngen a; Mizoramin buhfai a hmuh zat a pun chuan buhfai leina atana Mizoram sorkar sum sen a hniam phah dawn thu a sawi.

Unoin Minister chuan, state mamawh ang zelin India sorkarin buhfai a ngaihtuahsak dawn tih a sawi a; sorkar laipuiin mi nuai 100 vel hnenah buhfai a thlâwnin a sem mek thu sawiin, "Heng buhfaite hi a dawng tur dik takte hnen a thlen a pawimawh," a ti.

Jayantibhai Bambhaniya chuan, dik lo taka ration card nei leh dawng tlak hming chuangte zawn chhuah a, paih bo a nih theih nan leh, buhfai semnaah rinawmna leh langtlang a awm theih nan beneficiary database siam thar a nih thu a sawi.

Chief Minister chuan, Mizoramah buhfai dahna kudam ṭha zawk mamawh a nih thu sawiin, hmalakpui turin Union Minister a ngen a; Thenzawl (metric ton 3,000), Vaseikai, Lawngtlai district (MT 2,000), Khawzawl district (MT 2,000) leh Thingdawl (MT 1,000)-ahte kudam sak dilna a thlen.

Jayantibhai Bambhaniya chuan, hmunhma/ram a awm phawt chuan sorkar laipui chuan kudam sakna tur sum mamawh angte a ngaihtuahsak tur thu a sawi.

CM Lalduhoma chuan, buhfaia Mizoram mamawh phuhru turin 'Bharat Rice' lak luh a nih theih nan ṭanpui turin Union Minister a ngen a; Bambhaniya chuan, Bharat Rice la lut turin khuahkhirhna a awm loh thu sawiin, a ṭul anga a lo bawhzui tur thu a hrilh.

Chief Minister hi Food, Civil Supplies & Consumer Affairs minister B Lalchhanzova leh hotu dangte'n a ṭawiawm a ni.