Oil leh gas a tam tâwk - IOC

Indian Oil Corporation Limited (IOC)-a Mizoram tana State Coordinator, Mualkhang Bottling Plant Project-a DGM (LPG-E) chuan, Mizoramah petrol, diesel leh gas a tam tâwk tih a tarlang.

IOC State Coordinator chuan, sorkar laipui hnuaia oil company hrang hrang - IOC, BPCL leh HPCL ten harsatna awm loin tuialhthei leh gas te la lutin an la pe chhuak tih a tarlang a, "State chhung hmun hrang hranga mipui tan a tam tawk a ni," a ti.

Gas leh tuialhthei te chu harsatna awm loin tluang takin Mizoramah lak luh zel a nih thu te, filling station tinin harsatna an neih loh thu te, Mizorama tuialhthei leh gas awm zat chu ni tin vil reng a nih thu te, mipuite'n harsatna an tawh loh nan uluk taka vil reng a nih zel dawn thute a tarlang bawk.

IOC hotute chuan, gas leh tuialhtheiah hlauhthawn tur a awm loh thu sawiin, "Hlauhthawnna vanga tuialhthei chhêk khawl lo turin kan inngen a ni," an ti.