KHAWTHLIR

FOCUS workshop

Nimin khan Planning & Programme Implementation department conference hall-ah ni nga awh tur FOCUS 2.0 Start-Up Mission Workshop ṭan a ni a, Planning secretary David Lalthantluanga'n a hawng. FOCUS 2.0 project hi kum ruk chhung kalpui tur a ni a, Mizorama district 11-a chhungkaw 75,000-te dinhmun chawi kâng tura hmalakna tur a ni.

Lei laih khap rih

Hnahthial bawrhsap K Vanlalruati chuan thupek chhuahin, fûr thleng turah in sak leh thil dang vanga lei laih leh a kaihhnawih ti rih lo turin Hnahthial khawpuia chengte a hriattir. Lei laih leh a kaihhnawih mamawhna pawimawh/ṭul bik a awm a nih chuan thuneitute hnen aṭangin phalna lak hmasak tur a nih thu a tarlang. Thupek bawhchhiate chu kum khat chhung tantir emaw, pawisa chawitir emaw, a pahnih emawa hrem theih an ni.

Spoil bank-ah chauh paih turin ti

Aizawl district bawrhsap Lalhriatpuia chuan thupek tichhuakin, Aizawl district hmun hrang hrangah kawng laih hna thawh meka lei laih vûngte chu a paihna hmun tura ruat bikah chauh paih tur a nih thu a tarlang. Leivung paihna tura hmun ruat (designated spoil bank) ni lo, hmun dangah leivûng paih an awm a nih chuan a mawhphurtute chu dan anga hrem theih an nih thu a tarlang bawk.

Theihtawp chhuah turin chah

Chief electoral officer Dr Lalrozama chuan nimin khan Aizawl SP conference hall-ah sorkar laipuiin electoral roll ennawn runpui a kalpui mek, Special Intensive Revision (SIR) of Electoral Rolls chungchanga e-roll kaihhnawih thawktute training a hawng a; CEO chuan, Mizoram khua leh tui dik takte chauhin vote an neih theih nan theihtawp chhuah turin kalkhawmte a chah. Training-ah hian Mizoram puma election officer, electoral registration officer, assistant electoral registration officer leh district level master trainer-te an tel a; joint CEO Ethel Rothangpuii'n kaihruaiin, F Lalnisai leh Timothy R Lalhmangaiha te'n thil pawimawh an zirtir a ni.