MUHCS card lak theih dan tarlang

Mizoram State Health Care Society (MSHCS) chief executive officer (CEO) Dr Lalhriatzuali Ralte chuan, Mizoram Universal Healthcare Scheme (MUHCS) card chu sorkar hnathawkte leh pawisa pea inziak lutte tan muhcs.mizoram.gov.in aṭangin dil leh lak theih a nih thu a tarlang.

Dr Lalhriatzuali Ralte chuan, sorkar hnathawk leh mipui náwlpui pawisa pea MUHCS-a inziak lut (general beneficiary) te tan muhcs.mizoram.gov.in ah MUHCS card dil theih a nih thu a tarlang a, "Chhungkaw member tin Aadhaar card leh thlalak (âwm - chest leh a chung lam lang fiah tak) upload tur a ni. Naupang kum 5 hnuai lam tan MUHCS card siam a ngai lo a, a nu/pa card a hmang thei ang," a ti.

MSHCS CEO tarlan danin, MUHCS card dilna chu MSHCS-in a pawm hnuah card chu download theih a ni a, MUHCS card dil tur tan MSHCS youtube channel-ah dil dan kaihhruaina en theih a ni. Sorkar hnathawk pension (civil pensioner) leh gant-in-aid (GIA) employee tan MUHCS card a la siam theih loh.

Card neih hmaa damdawi-ina enkawl ngaite tan MUHCS-a inziah luhna lehkha (subscription form) hman theih a ni a; AB PMJAY (golden card) hmang theite tan golden card an neih sa hman theih a ni a, MUHCS card siam a ngai lo.