Sawhthing demand a awm tak tak hun April thla chawhnu lam - Adviser to CM

Tuirial Secondary Collection Centre aṭanga sawhthing hralh hnuhnun ber turte chu nimin khan Tuirial SCC (Tuirial Airfield) aṭangin adviser to chief minister (Handholding) Dr KC Lalmalsawmzauva'n a vailiam. Adviser to CM chuan, sawhthing demand a awm tak tak hun chu April thla chawhnu lam a nih thu a sawi.

Dr KC Lalmalsawmzuava chuan, Tuirial SCC aṭanga sawhthing hralh hnuhnun berte chu kg khat Rs 51-a tihral a nih thu a sawi a, "Kan zavaia thawhhona vanga tun hun thleng thei kan ni. Sawhthing market kan kalpui mekah hian mâwlmang taka kalpui kan tum lo a, research base-a kalpui kan nih avangin tum mumal tak nen year-wise target neiin hma kan la mek," a ti.

Sawhthing avangin Mizoramin state páwn lamah hriat a hlawh ve tawh nia sawiin Lalmalsawmzauva chuan, "Kan sawhthingte Cachar, Bagha leh Siliguri vela tawp ṭhin kha Mumbai, Delhi, Punjab, Kolkata, Odhisa, Andra Pradesh leh ram dangte a thleng ve ta," a ti a; NITI Aayog-in Mizoram chu Ginger Capital of India-ah a puan tawh thu a sawi.

Adviser to CM chuan, nikum leh kumina an tawnhriat aṭangin sawhthing demand a awm tak tak hun chu April thla chawhnu lam a nih thu a sawi a, "A chhan chu phai khaw lum lam thar a zawh ṭan vang a ni. Tuna a man a san chhan pakhat chu, Id (May 27)-a awm tur inbuatsaihna vang leh India ram hmun danga thar a tlem tak deuh vanga ni pakhat," a ti.

Kumina sawhthing hralhnaa harsatna ber chu a man bithliah (rate) awm har a nih thu sawiin Adviser to CM chuan, "Sorkarin kan la har deuh anga lang bakah, a rate a tirah kan tuk sang lutuk kha a ni. Farmer-te'n a chawh leh a lin a inrual a, farmer-te calendar a buai. Mahse, demand awm hun hi April thla chawhnu lam a ni miau si," a ti a; demand awm laia supply thei tura inbuatsaih a ngaih thu a sawi.

Dr KC Lalmalsawmzauva chuan, kut hnathawktute leh sorkar lamin tih tur an neih ve ve thu sawiin, "Sorkarin warehouse lian, sawhthing tam tak leng tur kan lo buaipui ang a, a tam thei ang processing lam kan buaipui bawk ang. Farmer lamin mahni huanah a dahṭhatna, lei laih khuara chawh sa dahṭhat lam in lo tum ve ang. Hetiang hi khawvel hmun dangah pawh an uar hle a ni," a ti.

Adviser to CM chuan, sawhthing buaipuitu sorkar hnathawke inpekna ropui a tih thu sawiin Lalmalsawmzauva chuan, "In pocket-a lut ve tur ni lo, kut hnathawktute hmangaih vang leh sorkar programme a nih avanga rinawm leh taima taka in mawhphurhna in hlen hi a ropui," a ti a; SCC leh primary collection centre (PCC)-a sawhthing buaipuitute inpekna lawmawm a tih thu a sawi.