KHAWTHLIR

Police-in meth man

Mizoram Police chuan May 18, Thawhṭanni tlai dar 5:45 khan Manipur aṭanga Aizawl pana tlan Nexon car ML-05 V-3282 aṭangin methamphetamine mûm 2,02,000 (kg 24.016) an man. Meth an man hi tualchhunga hralhna angin 19,21,28,000 hûa chhut a ni a; car-a chuang Th Onkhothang Haokip (33), Moreh, Manipur leh Mathew (46), Jolzam, Churachandpur, Manipur nia inchhálte an man bawk.

Ngaihtuah ṭhat leh turin dah

May 18, Thawhṭannia Council of Ministers-in an pawm zinga tarlan, 'The Daft Aizawl Municipal Corporation Building (Amendment) Regulations, 2026' chu pawm a la ni lo a, ngaihtuah ṭhat leh tura dah a ni. Sorkar thuchhuah chuan pawm angin a tarlang zet a, a hnuah ngaihtuah ṭhat leh tur a ni tih tarlan a ni.

Corporator-in hmalakna bawhzui

AMC executive corporator Christina Roluahpuii Sailo chuan AMC term liam taa a hmalakna, Ward-VIII chhunga civil mite'n police-ah gas connection an neih theihna tur chu bawhzuiin May 18, 2026 khan 1st MAP commandant Rex Zarzoliana Vanchhawng a pisaah a hmu. Corporator hian an ward-a chhungkua eng emaw zatin Police-a gas connection dilna an thehluh tawh la tihfel loh eng emaw zat a awm thu sawiin, tihfel a nih theih nan hma la turin a ngen a ni.

Kawng khâr dawn

Mizoram PWD chuan vawiin aṭang hian Ramthar Veng Sihpui leh Ṭhuampui kawng, Chite lei bul an thawm ṭhat dawn avangin hna thawh chhungin kawng khâr a ni dawn tih Traffic SP-in a tarlang. Vawiin zing dar 9-ah hna ṭan a ni dawn a, hna thawh zawh hma chu kawng khar a ni ang.

Ṭawih thei lo sâwngbâwlna hawng

Kawlkulh khuaa Plastic Waste Management Unit (PWMU) sak thar chu May 18, Thawhṭanni khan WATSAN Committee chairman C Rosangliana'n a hawng. PWMU hi Khawzawl block tana ruahman niin, Swachh Bharat Mission (Gramin) 2.0 aṭanga sum hmuh hmanga sak a ni a, Kawlkulha chhungkua 850 vel bakah, a chhehvela khaw hrang hrangte'n an hman ṭangkai theih tura ruahman a ni.

Aadhaar sawiho

Serchhip District Aadhaar Monitoring Committee chu district bawrhsap Paul L Khuma kaihhruaiin nimin khan chak zawka Aadhaar enrolment kalpui dan tur an rel. Mizoram projected population 14,16,000 zinga 92.4%-te'n Aadhaar an nei tawh tih tarlan a ni a, naupangte'n kum 5 leh kum 15 an tlinin Mandatory Biometric Update (MBU) an tih ngei a ṭul thu tarlan a ni.

Campaign hawng

Siaha district bawrhsap VL Hruaizela Khiangte chuan nimin khan DC conference hall-ah Janjatiya Garima Utsav 2026 hnuaia ‘Jan Bhagidaari - Sabse Door, Sabse Pehle' campaign a hawng. Campaign hi Siaha district-a DAJGUA village 27-a kalpui tur a ni a, sorkar laipuia Ministry of Tribal Affairs-in tribal mite hmasawnna tura a duan niin, May 18-25, 2026 chhung kalpui tur a ni.