Ram hectare 11,500-a zauah ṭhelrêt kûng nuai 51 chuang phun thar tum

Chief minister Lalduhoma chuan, Chief Minister Rubber Mission hnuaiah ram hectare 11,500-a zauah ṭhelrêt (rubber) kûng nuai 51 chuang phun thar tum a nih thu a sawi.

CM Lalduhoma hian nimin khan Hmunpui khuain sorkar aṭanga hmasawnna an neihte lawmna an buatsaih a hmanpui a; Mizoramin ṭhelrêt chìn theihna ram a neih ṭhat thu sawiin, "Rubber hi kum 40 thleng a hnài theih a, a hnài tlak tawh loh hnuah thingzaia hman leh theih a ni. Ramngaw a siam a, tuihnâ a tipung a, a hralhna a ṭha bawk si. CM Rubber Mission hmangin ram hectare 11,500-a zauah rubber kung nuai 51 chuang phun thar kan tum," a ti.

Bána Kaih scheme kaltlanga an thawhpui (progress partner)-te chu a tìrah hectare khat ṭheuh pek phawt tum a nih thu sawiin Lalduhoma chuan, "A ṭul anga zauh zel theih turin hma lo la se kan ti. Thawh khatnaah khan potential kan neih ṭhatna Mamit leh Kolasib district-ah hectare 1,000-a zauah bul kan ṭan a, thawh hnihnaah district pariata hectare 2,575-a zauah kan kalpui leh," a ti a, Hmunpui pawhin hectare 25 an chan thu a sawi.

Chief Minister chuan, Hmunpui khuain sorkar kaltlanga hmasawnna hrang hrang an neihte a lawmpui thu sawiin, "Sorkarin a theihna apiangah a ngaihsak zel dawn che u a, in khaw power supply lakna kalkawng pawh a tharin survey kan nei mek," a ti.

Hmunpui khua hian an khaw din tirh aṭanga a vawi khat nan kawngpui blacktop an nei thar, health sub-centre building leh quarters thar an nei a, CM Rubber Mission thawh hnihnaah ṭhelrêt hmun hectare 25 an hmuh bawk. Hengte hi an khaw community hall-ah an lawm a, bialtu MLA H Lalzirliana pawhin a hmanpui a ni.