School Health and Wellness inzirtir

National Health Mission leh State Council for Educational Research & Training (SCERT) chuan nimin khan SCERT auditorium-ah ni thum awh tur 'Training of Nodal Teachers on School Health and Wellness Programme under Ayushman Bharat' an buatsaih ṭan.

Zirhona hi Saitual district-a sorkar sikul leh sorkarin a puih sikula principal, headmaster leh zirtirtute puala buatsaih a ni a; SCERT director Caroline Zoramthangi'n thu a sawi a, SCERT project coordinator Laldampuii'n training kalphung a sawifiah.

Saitual district tana training hi hlawm ruka neih tur a ni a, nodal teacher-te'n an sikul ṭheuhah chawlhkar tin vawi khat tal zirlaite an zirtir ṭhin dawn a ni.

Ayushman Bharat Health and Wellness Programme hi sorkar laipuia Ministry of Health and Family Welfare leh Ministry of Education te hmalakna a ni a; zirlaite'n an ṭhanlennaah rilru hrisel neia thiam taka nun an hmachhawn thiam nan leh, mi dangte nena nunho dan dik inzirtirna tur atana ruahman a ni.