SRDC inkaihhruaina ennawn mek

Sialkal Range Development Council (SRDC) chu nimin khan an chairman F Rodingliana, Lengteng bialtu MLA kaihhruaiin a pisaah an ṭhukhawm. F Rodingliana chuan, SRDC huam chin tihzauh tum mek thu leh, sorkarin SRDC manual leh inkaihhruaina a ennawn mek thu a sawi.

F Rodingliana chuan, SRDC-in a huam chin chungchangah, "Tuna khaw paruk bakah hian a chhehvel khua eng emaw zat chu SRDC hnuaiah rîn luh tum a ni. Khawchhak tlangdunga Myanmar ramri hnaiha awm khuate tihhmasawn kawngah Mizoram sorkarin nasa takin ngaihtuahna a sêng a, hemi tur hian SRDC area zauh mai bakah, dan mumal tak hnuaia inrêlbàwlna a awm theih nan sorkarin SRDC manual leh inkaihhruaina dante a ennawn mek a ni, " a ti.

SRDC tana sorkar hmalaknate a puitlin hunah chuan SRDC huam chin khuate'n nasa takin hma an sawn a beisei thu F Rodingliana chuan a sawi a; sorkar kum tharah chuan SRDC budget tihpun a nih a beisei thu a sawi bawk.

Ṭhutkhawmah hian kum 2026-27 chhunga SRDC-a khaw paruk - Mimbung, Hrianghmun, Kâwlbêm, Teikhang, Selàm leh Vaikhawtlang khuaa hmaasawnna hna thawh turte sawiho a ni. Champhai North bialtu MLA H Ginzalala, Ngopa SDO (Civil), SRDC member-te leh khaw paruka VC president-te an tel.