Dy Speaker-in zirlai chawimawina hmanpui

Assembly deputy speaker Lalfamkima chuan nimin khan a biala MZP Sub-Headquarters, Bairabi-in Bairabi North YMA Hall-a Mizo zirlai ti ṭhate chawimawina an buatsaih a hmanpui a; chawhnu lamah Pangbalkawnah zirlai ti ṭha chawimawina a hmanpui bawk.

Bairabi-a zirlai chawimawinaah Deputy Speaker chuan, zirlaite'n an hmabak an thlirnaah mahni an inhriat chian a ngaih thu sawiin, "Ṭhiante tih ang ti ve ringawt loin, mahni tuina leh ṭhahnemngaihna zawng thlan thiam a pawimawh a, pawisa tam lam aiin mahni tuina zâwnah chuan hlawhtlinna a hnai zawk ṭhin a ni," a ti.

Ṭhian kawmah fimkhur a ṭul thu sawiin Lalfamkima chuan, "Degree ringawt aiin thiamna tak tak neih a pawimawh. Tunlai changkanna leh artificial intelligence khawvelin min tuam mek lai hian, zirna leh hriatna tizautu atan hman ṭangkai thiam a pawimawh," a ti a; tunlaia thiamnate chu a ṭha zawnga hmang turin zirlaite a chah.

Pangbalkawna zirlaite chawimawinaah Deputy Speaker chuan, belhchian dâwl leh thiamna tak tak neih tuma ṭan la turin zirlaite a chah a, "Hna sang leh hniam bik a awm lo a, eng hna pawh thawk ila, taima leh awhawm taka thawh theih a pawimawh," a ti. Mizoram Youth Commission kaltlangin ram pawn thlenga hna thawk turin kawng a awm tawh dante a sawi bawk.