Green Mizoram Day hman dan tur rêl

State Level Sub-Committee on Green Mizoram chu nimin khan Environment, Forests & Climate Change minister Lalthansanga hoin Chief Wildlife Warden conference hall-ah an ṭhu a; kumina Green Mizoram Day thupui atan 'Thing hi rangkachak anga hlu, nunna tinrêng bul a ni' (Trees are green gold, the roots of all life) tih an thlang.

Ṭhutkhawmnaah hian, kumina Green Mizoram Day hman dan tur rel a ni a; a hmanna pui ber (state level function) chu Youth Recreation Centre, Falkland Vengah June 11, 2026-a hman tura rel a ni. Kum 2025 chhunga hmalakna hrang hrangte an thlirho bawk.

Minister Lalthansanga chuan, ramngaw hlutzia leh humhalh a ṭulzia sawiin, "Thing phun lama ṭan kan lak nasat a ṭul rualin, a enkawl zelnaah tih tur a tam hle. Sorkar leh mipuite'n mawhphurhna sang tak kan nei a ni," a ti.