Online Medical Referral System tlangzarh

Health & Family Welfare minister Lalrinpuii chuan nimin khan Secretariat conference hall-ah mipui tana healthcare service leh sorkar hnathawh tihchak zualna tura duan 'Online Medical Referral System' (https://medicalreferralmizoram...) a tlangzarh.

HFW Minister chuan, online hmanga awlsam taka medical refer tih theih a ni ta chu a lawm thu a sawi a, "Digital hmalaknate hi healthcare governance tihchangtlunna leh mipui tana kawng awlsam leh hmalakna ṭha zawk thlenna kawnga hmasawnna pawimawh a ni. Online system hi document dahṭhat nan te, information inpek nan leh awlsam zawka mipui dawrna kawngah kan hman ṭangkai thiam a ṭul," a ti.

Medical officer-te chu chak taka hma la zel tura chahin Lalrinpuii chuan, "He Online Medical Referral System hi a nihna tur taka hman a nih theih nan kan hnathawhnaah tih tak zet leh thâ thlah loa kan thawh a ngai. Emergency refer atan a ṭangkai hle dawn a, a viltute'n an vil hneh a ngai dawn hle a ni," a ti a; HFW department hnuaia hmalakna tharte chu hmang ṭangkai zel turin thawktute a chah.

Online Medical Referral System hi Directorate of Hospital & Medical Education leh Mizoram State e-Governance Society ten sorkar hnathawkte tana an siam a ni a; phone/computer aṭangin https://medicalreferralmizoram... ah lutin, Rs 20 chawiin permission dil tur a ni. Harsatna nei tan office hun chhungin phone no. 6909319420-ah biak theih a ni bawk.