Aizawla sikul 10 hnenah smart TV sem

Rotary Club of Aizawl chuan Rotary Club of Pune Far East leh Suttatti Enterprises Ltd te nen ṭanghoin corporate social responsibility (CSR) aṭangin nimin khan Aizawla sikul 10 hnenah smart TV hmanga zirtirna e-learning kit an sem.

Zirna tihhmasawnna hmanrua, 'Saksham eLearning Project' hmanga smart TV semna inkhawm hi Aijal Club-ah buatsaih a ni a, Education minister Dr Vanlalthlana'n hmanpuiin, sikul 10 hnenah TV a hlan.

Dr Vanlalthlana chuan, sikul 10 hnena Saksham eLearning Kit pek a ni chu ṭha a tih thu sawiin, "Thingtlang sikula naupangte pawhin khawpuia zirlaite ang bawkin zirna ṭha an mamawh a, Rotary Club-te'n hetiang hmanrua zirlaite hnena an pe hi a lawmawm a, naupangte'n hma an sawn phah ngei ka beisei," a ti.

Rotary Club of Aizawl tarlan danin, Saksham eLearning Project hi thiamna thar hmanga zirna changtlung leh ṭha zawk pekna tura ruahman a ni a; rî leh thlalak (audio-visual) hmanga awlsam leh changkang zawk, curriculum nena inmil sia zirlaite zirtirna tur a ni.

Saksham eLearning Project unit pakhatah pawl 1-10 zirlai huamin, software nena thlun zawm smart TV inchi 43-a lian pakhat a awm a, mamawh dan anga tihchangtlun (upgrade) theih a ni.

Rotary Club of Aizawl hruaitute chuan, Mizorama sikul leh khawsak harsa zawkte tan hmalak zel an tum thu an sawi.