KHAWTHLIR

Certificate hlan

Champhai, Serchhip, Mamit leh Khawzawlah nimin khan Bána Kaih (Handholding) hnuaia CM Special Package phase-II dawng tura thlan mi 66 hnenah certificate leh placard hlan a ni. Champhai district-ah mi pathum, Serchhip district-ah mi 49, Mamit district-ah mi pali leh Khawzawl district-ah mi 10 thlan an ni a; direct benefit transfer system hmangin CM Special Package aṭanga ṭanpuina sum (grant) chu an bank account-ah ṭheuh thun a ni ang.

Officer insîksawi

Mizoram chief electoral officer (CEO) atan Garima Gupta, IAS ruat thar a ni a, CEO kalchhuak Dr Lalrozama, IAS (2009 batch) chu Higher and Technical Education secretary thar a ni. PWD engineer-in-chief ṭhin H Zoramliana chu pension-a a chhuah avangin David Sapzova chu PWD E-in-C thar a ni bawk.

Meth man

Assam Rifles leh Excise & Narcotics department mite chuan May 19, Thawhlehni khan Vapar, Champhai district-ah methamphetamine mûm 570 an man. Ruihhlo hi a neitute'n an tlanchhiatsan a, man hman an ni lo.

Lawmpuina hlan

Saituala village council pathum chuan bialtu MLA Prof. Lalnilawma, minister of state-in hna a thawh ṭhat avanga lawmthu sawi nan nimin khan thil pek an hlan. Saitualah hian VC pathum an awm mek a, VC pahnih chu MNF party sorkarna VC an ni.

Natna hrik lak chhuah dan zirho

Zoram Medical College & Hospital-a Department of Microbiology chuan nimin khan 'Hands-on workshop on 16s rRNA & bacterial whole genome analysis’ an buatsaih a, Mizoram University vice chancellor Prof. Dibakar Chandra Deka-a'n a hawng. Zirhona hi ni thum awh tur a ni a; Oneomics India leh Ministry of Electronics and Information Technology hnuaia Centre for Development of Advanced Computing expert-ten natna hrik genes lak chhuah dan an zirtir dawn a ni.

Din champha lawm

Mizoram Transformation Movement (MTM) chuan kum khat an tlin champha nimin khan an pisa, Transformation Hub, Temple Square-ah an hmang. Inkhawmah hian MTM general secretary Dr Vanlalsiama Chhangte-in kum khat chhunga an pawl hmalak dan a sawi a; president Dr Lalbiakmawia Ngente-in thuchah a sawi.

Awareness campaign

Power & Electricity department chuan May 19, Thawhlehni khan Champhaia Sub-Headquarter YMA Zawlbukah PM Surya Ghar: Muft Bijli Yojana (Month of solar) awareness campaign an buatsaih. PM Surya Ghar hi kum 2024-ah tlangzarh a ni a, India rama mimal in nuai 100 chunga solar bunna tura ruahman a ni a, March 31, 2027 thleng kalpui a ni dawn. Scheme aṭang hian solar bunna senso 50% chuang sorkar laipui aṭangin a hmuh lêt theih a ni.