MZU-ah ṭawng chungchang zirho a ni

Mizoram University-a Mizo department chuan nimin khan MZU-ah ni thum awh tur 'Language, Culture & Literature in Northeast India' tih hmangin international seminar an buatsaih ṭan a; India hmarchhak state-a hnam hrang hrangte ṭawng, hnam nunphung leh thu leh hlate zirho a ni.

Zirhona hi MZU Mizo department-a HoD Dr Zoramdinthara'n a kaihhruai a; khuallian Prof. Pravakar Rath, MZU pro vice chancellor chuan thu sawiin, ṭawng chu hnam min phuar khawmtu, inunauna siamtu leh hnam ro hlu a nih thu a sawi a, nnam zia leh thu leh hlante nasa lehzuala zir a, rinthlak thu leh hla ziak uar zel turin kal khawmte a sáwm.

Prof. Pravakar Rath chuan, India hmarchhak state-ah ṭawng chi hrang a tam thu sawiin, "Mahni pianpui ṭawng kan thiam ngei ngei a ngai a, Mizote chuan Mizo ṭawng an thiam a ṭul. Mizo ṭawng hi Mizorama cheng zawng zawngin inbiak pawh tawn theih nan an hmang thei a, ṭawng tihmasawn turin mithiamte an ṭan zel a pawimawh," a ti.