International border-in min ṭhen hrang hi sut ṭhiah a la ngai dawn - Lalthansanga

Zo Re-unification Organisation(ZORO) chuan nimin khan MZP conference hall-ah an din champha vawi 38-na an lawm a; minister Lalthansanga'n a hmanpui. Minister chuan, Zo fate international border-in a ṭhen hranna chu sut ṭhiah a la ngaih dawn thu a sawi.

Ramri hung chungchang sawiin Lalthansanga chuan, "Zo hnahthlakte hi nuai 35 vel niin kan inchhût a, international border-in min ṭhen hrang hi sut ṭhiah a la ngai dawn. Khawchhak lam aṭanga lo kal zingah thil ṭha lo tam tak a tel tiin Central sorkarin a ngaimawh hle a, Home Ministry aṭangin nawrna pawh min pe nasa khawp mai," a ti.

Lalthansanga chuan, "Keini chuan kan unaute nena inkarah pal inhung hranna awm lo se kan duh em em laiin, Home Ministry lam nawrna avang hian kan duh loh thil a thleng thei," a ti a; ram dang aṭanga Zo hnahthlak Mizorama chengte chu an khawsak dan leh eizawnnaah duhtuia fimkhur turin a chah.

Hnam chungchang sawiin Lalthansanga chuan, "Kan Mizo nihna hi chhuang takin awm ila, hnam dang ṭawng aiin kan ṭawng hi hnam dang lakah pawh kan rawlh zel zawk tur a ni. Kan rama lo zinte pawhin kan ṭawng an zir theih zawk nan kan ṭawng hi ngaihlu zel ang u," a ti.

Inkhawm hi ZORO president R Sangkawia'n a kaihruai a; resource person Lalmuanpuia Punte, Adviser to CM-in 'Zofate dinchhuahna' tih thupui a sawi. Resource person dang Prof. J Doungel, MZU-in 'Ramri hung' tih thupui a sawi bawk.