Central scheme-a hmalakna thlirho

Champhai leh Khawzawl district-a District Development Coordination & Monitoring Committee (DISHA) chu May 19, Thawhlehni leh nimin khan an ṭhukhawm a; Lok Sabha MP Richard Vanlalhmangaiha kaihhruaiin, sorkar hotute leh khawtlang hruaitute an tel.

Richard Vanlalhmangaiha chuan, district hmasawnna ngaihtuah turin DISHA-in mawhphurhna lian tak a neih thu a sawi a, "District tan ṭhahnemngai taka kan thawh a ngai a, kan hnathawhte inhriatpui a, thawhho theihna laite ngaihtuaha sawiho ṭhin a pawimawh," a ti.

Lok Sabha MP chuan, an harsatnate sorkar laipui hotute hnenah a thlensak tur thu a sawi a; sorkar laipui scheme hrang hrang hnuaia hamṭhatna dawngtu turte uluk taka thlang turin official-te a chah bawk.