Khualzinte Mizorama tlawh tur leh hun ṭha hrilh a ngai - Tourism Minister

Tourism department chuan nimin khan Economics & Statistics conference hall-ah 'Consultative Workshop on Developing Global Standard Tourist Destinations' an buatsaih a, Tourism minister Lalnghinglova Hmar-in hmanpuiin, khualzinte hnenah Mizorama hmun tlawh turte leh tlawh hun ṭhate hriattir a ngaih thu a sawi.

Lalnghinglova Hmar chuan, Mizoramin tourism-ah theihna a neih ṭhat thu sawiin, "Hei hian state leh a economy hmasawnna atan a thawh thei. Khualzin hîp nan leh tourism tihhmasawn zel nan thil pawimawh tak tak a awm a, tourist-te hnenah Mizorama hmun tlawh tur ṭha te, tlawh hun ṭha leh tlawh chhan turte dik taka hriattir a ngai," a ti.

Tourism chuan khualzinte tlawh hmun chauh ni loin, a chhehvela hmun dangte leh mite thlengin hlâwkna a pe tih sawiin Minister chuan, "Hei vang hian tourism sector-ah sorkar hnathawk ni lo, mi dang (outsourcing) leh khawtlang mipui (community) nena ṭan tlan a pawimawh," a ti a; khualzin lo kaihruaitute leh lirtheia phur veltute'n an sumdawnna chu dik taka an kalpui a ṭul thu a sawi.

Tourism Minister chuan, Mizoram mawina leh Mizo ziarâng leh nunphung te vawng nunga humhalh tlat turin kal khawmte a chah a, "Hei hian state pawn lam mikhualte hîp nan leh tourism sector tihhmasawn nan nasa takin a ṭanpui dawn a ni," a ti. Tourism department-in Mizoram Tourism Calendar a siam thu sawiin, kal khawmte chu an ngaihdan leh rawtna te inthlahrung loa thawh turin a sáwm.

India rama state leh union territory tina khawvel hmun dangte el phak khualzinte tlawh duh hmun (tourist destination) pakhat tal nei tura sorkar laipuiin a tih angin, Mizoram tana hmalak dan tur sawihona atana zirhona hi buatsaih a ni a; kal khawmte'n an ngaihdan leh rawtna te an sawi a ni.