Minister-in Hlimen khelmual thar a hawng
Aizawl Smart City Limited-in Hlimena football khelmual an siam thar chu nimin khan Uurban Development and Poverty Alleviation (UDPA) minister K Sapdanga'n a hawng. Khelmual siamna leh phullem phahna atan cheng vbc 10.65 sèn a ni.
UDPA Minister chuan, Mizote chu India ram pumah football khel thiama hriat an nih thu sawiin, "ISL leh I-League-ah te pawh player chhuanawm tak tak kan nei ṭha a, he kan hmingṭhatna hi chhawm nun a nih zel theihna turin khelmual hawn thar pawh hian kawng ro tam tak a sut ngei ka beisei," a ti.
K Sapdanga chuan bul lo ṭantu sorkar hmasate fakawm a tih thu sawiin, "Tunah infiamna lam tuipui tlattu Sport Minister kan nei lehzel hi Mizo ṭhalaite an vannei," a ti a, Mizo ṭhalaite'n an vanneihna hi an chhawr thiam lo ang tih a hlauh thu a sawi.
Hlimen khelmual chu khelmual nuam satliah ni loin, ṭhalai tam tak football lama mi chhuanawm chher chhuaktu a nih a duh thu sawiin K Sapdanga chuan, "Hriselna leh mahni invawnna kawngahte Hlimen khawtlang tan malsawma thlen theitu a nih ngei ka beisei," a ti a; Hlimen Local Council chu neitu nihna pek an nih angin, khelmual hlutna hria a, uluk taka enkawl zui turin a chah.
K Sapdanga chuan tun hnaiah police leh home guard-te sorkarin lak thar a tum tih sawiin, "Infiammi, thahrui ngah leh discipline ṭhaten mit an la hle dawn a ni. He sorkar hian ṭhalaite thalaite cho chhuak zawng project a uar zel ang," a ti.
Bialtu MLA Baryl Vanneihsangi pawhin thu sawiin, khelmual hawn a ni ta chu Hlimen khawtlang tan ni chhinchhiah tlak a nih thu a sawi a, "He khelmual thar hi ṭhalaite tan eizawnna ngêlnghet siamsaktu a nih ka beisei," a ti.
Aizawl Smart City chief exexutive officer CC Lalchhuangkima tarlan danin, Hlimen khelmual siamtu contractor chu Lalhming Infrastructure and Construction Pvt Ltd-in an ni a, April 25, 2022-a siam ṭan niin, February 28, 2026-ah siam zawh a ni. Khelmual zau zawng chu a dung metre 100 leh a vâng metre 50 a ni a, mi 696 ṭhut theihna gallery a awm. Zana inkhelh theih turin flood light dah a ni bawk.