KHAWTHLIR

MLA-in laptop pe

MZP Sub Hqrs, Bilkhawthlir chuan May 20, Nilaini khan an khaw community hall-ah Serlui bial aṭanga kumin HSLC leh HSSLC-a pass tharte lawmpuina hun an buatsaih. He hunah hian Serlui bialtu MLA Lalrinsanga Ralte chuan a bial chhung sikul aṭanga HSLC leh HSSLC distinction-a pass mi 11-te hnenah laptop, thuchei leh lehkhabu a pe a ni.

AR-in anchiri man

Assam Rifles sipaite chuan May 19, 2026 khan Mizoram leh Myanmar inrina Zorinpui bula Sekulh luia tawlh lai anchiri (Paris polyphylla) ip 150 an man a, a tawlhtu mi pathum an man bawk. Anchiri an man hi Rs 51,00,000 a nih thu an tarlang a, Bungtlang Police Station leh Lawngtlaia EFCC department thuneitute hnenah an hlan a ni.

Din champha lawm

Assam Rifles Ex-service-men Association chuan May 20, Nilaini khan Ramhlun Indoor Stadium-ah an din champha vawi 67-na an lawm a, Assam Rifles 23 Sector DIG Brig. Puspendar Sorayan leh 34 Assam Rifles commander Col. Laldinpuia ten an hmanpui. Brig. Puspendar Sorayan chuan, AR sipai bangte chu ram leh hnam tan theihtawp lo chhuah tawh ṭhinte an nih thu sawiin, hriselna ṭha taka nun hmang zel turin duhsakna a hlan.

Hmalakna thlirho

Siaha SDO (Sadar) Vanlalchhuanliana hoin nimin khan District Level Consultative Committee/District Level Review Committee an ṭhukhawm a; bank hrang hrangte hnathawh leh tih tur bitukte an thlir. Siaha district-ah bank branch pariat - MRB pathum, MCAB pahnih, SBI, IDBI leh HDFC pakhat ṭheuh a awm thu leh, January-March 2026 chhunga chu'ng bank-te credit deposit ratio chu 81.13% a nih thu tarlan a ni.

Ar notê sem

Khawzawl Wildlife Division hmalaknain May 20, Nilaini khan CSS - Integrated Development of Wildlife Habitat (IDWH) hnuaiah Ngopa leh Làmzáwl khuaah ar (rainbow rooster) notê 2,000 sem a ni. CSS-IDWH kaltlang hian kuminah ar notê ṭum li sem a ni tawh a, May 20-a sem hi kumina a tawpna tur a ni. Murlen National Park leh Lengteng Wildlife Sanctuary chhehvela khaw 13-a chêng chhungkaw 300 hnenah ar notê 15,000 sem a ni tawh.

Hnathawh thlirho

Hnahthial bawrhsap K Vanlalruati hoin nimin khan DCC, DLRC leh DLSC an ṭhukhawm a, January-March 2026 chhunga Hnahthial district-a bank hrang hrangte hmalak dan an thlirho. Bawrhsap hian Annual Credit Plan 2025-26 a tlangzarh. Hnahthial district-ah bank branch panga, ATM booth pahnih leh business correspondence 14 an awm mek a ni.

GAD thu bawhzui

Lawngtlai district bawrhsap Donny Lalruatsanga kahhruaiin nimin khan DC conference hall-ah Lawngtlaia sorkar depatrment hotute an ṭhu-khawm a, General Administration department-in sorkar inrenchemna tur (economy & fuel conservation measures) a puan bawhzui dan tur an rêl. GAD-in inrenchemna tur a puan chu a theih ang anga zawm an rel a ni.