Larsap hoin state pali Foundation Day lawm

Governor Gen. Dr Vijay Kumar Singh hoin May 20, Nilaini khan Lok Bhavan-ah Gujarat, Maharashtra, Sikkim leh Goa te state puitlinga hlankai ni, Foundation Day lawm a ni a; he hun hi India rama hnam inpumkhatna tura hmalakna, Ek Bharat Shreshtha Bharat hnuaia buatsaih a ni.

Gen. VK Singh chuan, India rama chengte zingah hnam ziarâng, nunphung, ei leh in, incheina leh tihl dangahte inang lo tam tak a awm thu sawiin, "Heng kan danglamnate hi India danglam bikna, ropuina leh chakna a ni," a ti.

Larsap chuan, Foundation Day an lawm state palite'n danglamna an nei ṭheuh tih sawiin, "Chutiang bawkin India ram state hrang hrangte hian mawina bik an nei ṭheuh a ni," a ti a; an hun hman chuan India ram hriat chian lehzualah kal khawmte a puih ngei a beisei thu a sawi.

Foundation Day lawmna inkhawmah hian Gujarat larsap Acharya Devvrat, Maharastra larsap Jishnu Dev Varma, Sikkim larsap Om Prakash Mathur leh Goa larsap Pusapati Ashok Gajapathi Raju te thuchah ngaihthlak a nih bakah, state hrang hrangte chanchin tarlanna video thlirho a ni. College of Veterinary Sciences & Animal Husbandry leh Mizo Higher Secondary School zirlaite'n hnam lâm leh zai an entir bawk.

May 1, 1960 khan Gujarat leh Maharashtra te chu state puitlingah hlankai an ni a; Sikkim chu May 16, 1975-ah leh Goa chu May 30, 1987-ah state puitlingah hlankai an ni.