Serchhip MJA-in MIFCO hmun an tlawh

Mizoram Journalists' Asso-ciation (MJA), Serchhip District member-te chuan an president Kapliana Pachuau hoin May 20, Nilaini khan Chhingchhipa MIFCO hmun an tlawh a, MIFCO chairman Lalṭhazuala Rawite leh thawktu dangte'n an hmunhmate fanpuiin, an hmalaknate an hrilhfiah.

Lalṭhazuala Rawite chuan, Chhingchhipa MIFCO hmunah kuminah mautuai/rawtuai leh baibing ṭîn, sapthei leh lakhuihthei tui siam an tum thu a sawi a, Chhingchhipa kan hmunah hian petrol pump din tumin hma kan la mek. Sairanga kan hmunah mineral water siamna tur khawl bun a ni tawh a, a taka hna thawhtir thuai kan tum. Bung Banglaa sa sawngbawlna hmun tur siam tawh sa pawh tuai tharin hman ṭangkai mek a ni," a ti.

Khawl hlui leh bungrua/in hrang hrang an thawm ṭhat thu sawiin Lalṭhazuala chuan, "Sum lak luh theihna tur hrang hrang kan dap reng. Loneitute tana ding kan nih ang ngeiin thlai leh thei sawngbawlna lam kan ngai pawimawh ber," a ti a; sorkar kal tawhte'n changtlung taka hmunhma an lo din chu lawmawm a tih thu a sawi.

MIFCO Chairman sawi danin, kuminah lakhuihthei kg khat Rs 18-in Chhingchhipa an hmunah an lei dawn a, sapthei kg khat Rs 45-in an lei ang. Mautuai/rawtuai leh baibing man tur erawh an la bituk thei lo a, a thar hunah bazara a man en chungin a man an bituk dawn a ni.

Serchhip District MJA president Kapliana Pachuau chuan, "Sorkarin mipui tana hma a laknate mipuiin an hriat ve a ṭul avangin MJA chuan sorkar hmalakna hrang hrangte tlawhin, mipui hnenah kan puangzar ṭhin," a ti a; MIFCO hmalaknate an hmuhin mipui tan MIFCO chu tuai thar leh a ni dawna a lan avangin lawmawm a tih thu a sawi bawk.