Bawrhsapin kawng siamte a enfiah

Lunglei bawrhsap Navneet Mann chuan May 20, Nilaini khan National Highway 54 & 302 zauh leh siamṭhat mekah Theiriat-Hrangchalkawn, Lungpuizawl-Zobawk leh Sazaikawn-Hauruang huam chhunga hnathawhte a enfiah a; fûrah mipuiin harsatna an tawh loh nan uluk taka kawngpui enkawl turin contractor-te a chah.

Bawrhsap hi Lunglei District Disaster Management Authority zonal officer-te leh sorkar official dangte bakah, kawng enkawltu NHIDCL leh kawng siamtu BRN Infrastructure aiawhte'n an ṭawiawm. Hna kal meka hmasawn dan an enfiah bakah, hmalak zel dan tur leh harsatna chinfel dan turte an sawiho a ni.

Lunglei Bawrhsap chuan, mipuiin fûr laia harsatna an tawh loh nan leh chhiatna thleng thei pumpelh a nih theih nan chak zawka hma la turin contractor-te a hrilh a; fûr hmaa kawng an blacktop hman loh turte pawh ṭha taka enkawla thawm ṭha turin a chah bawk.