PWD Minister-in Teirei lei a hawng

Bairabi leh Zamuang inkara Teirei lei dawh thar chu nimin zing khan PWD minister Vanlalhlana'n a hawng. Minister chuan, ZPM kaihhruai sorkarin mipui tan thil ṭha an la chhawp chhuah zel dawn thu a sawi.

Teirei lei dawhna atan hian NABARD aṭanga loan hmuh cheng nuai 1,365.60 sen a ni a, chumi hnuah SASCI aṭangin cheng nuai 1,400 ruahman belh niin, a vaiin cheng nuai 2,765.60 sen a ni. Kum 2017-ah bul ṭan a ni a, December 31, 2025-ah NABARD sum hmanga khawih bik chu zawh niin, SASCI hmanga khawih chin chu February 29, 2026-ah zawh a ni.

PWD Minister chuan, 'Kan ei ru lo ang, development ṭha takin kan thawk ang' tia an intiam thu sawiin, "Kum hnih leh a chanve chhungin thil tam tak kan ti tawh a, mipui tan thil ṭha kan la rawn chhawp chhuak zel ang. Hun kal tawhah kan engineer-te'n kawng ṭha leh tlo an siam thiam ta lo emaw tih tur khawpin sorkar hruaitute'n an enkawl a, tunah kawng ṭha tak tak an siam thiam a ni tih a takin kan hmu leh ta," a ti.

PWD minister Vanlalhlana chuan, Teirei lei hawn theih a ni ta chu lawmawm a tih thu sawiin, "ZPM sorkar hnuah lei ṭha tak tak hawn a ni nual tawh. Mipui chhawr ṭangkai tur tlo leh rin tlak a nih zel ka beisei a, ṭha taka hna thawktu te, a enkawltu PWD hotute taimakna a fakawm tak zet a ni," a ti a; AMC inthlana hneh taka ZPM an tlin chhan pakhat chu PWD engineer-te'n kawng ṭha taka an siam vang a nih thu a sawi.

Lei hawnna inkhawm hi PWD engineer-in-chief H Zoramliana'n a kaihruai a, Assembly deputy speaker Lalfamkima pawhin thu a sawi. PWD Minister puitu Lunglei West bialtu MLA T Lalhlimpuia, PWD hotute leh Mamit DC te an tel bawk.

Teirei lei siamtu contractor chu Sadguru Engineers & Allied Services an ni a, double lane Build-up Steel Girder Bridge niin, metre 102-a sei, lirthei tlanna chin metre 7.50-a zau a ni.