RINI Speech AI tlangzarh a ni

Mizo ṭawnga thu sawi chhu (type) chhuak nghal thei RINI Speech AI (artificial intelligence) chu May 21, Zirtawpni zan khan Information & Communication Technology minister Dr Vanlalthlana'n a tlangzarh. Application hi download a, hman nghal theih a ni.

Rini Speech AI hi USA-a awm Zoramthanga leh Dr Maria Sailo te siam a ni a; thusawi, kuta type ngai loa Mizo ṭawng, English leh ṭawng dang thenkhata chhu chhuak nghal thei a ni a; Mizo ṭawng hi English, Hindi, Spanish leh ṭawng dang ṭhenkhata a leh theih bakah, ṭawng dangte Mizo ṭawngin a let thei a ni.

ICT Minister chuan, Rini Speech AI chu Mizo mipui tan a ṭangkai hle dawn tih sawiin, "AI khawvela kan chen mek lai hian kan ṭawng hi a hnungtawlh thiang lo. Rini AI hi a tangkai hle dawn a, kan fate nasa lehzualin Mizo ṭawng hman dan dikah a kaihruai theiin ka ring," a ti.

Rini Speech AI siam a nih theihna tura hma latu Vanneihtluanga'n bul an ṭan dan a sawi a; Rini AI chu Mizo ṭawng dik humhalh nan a ṭangkai dawn thu sawiin, "Mizo ṭawng lehlinah Rini aia ṭha a awm chuang lo. Mizo ṭawng dik tak a hmang dawn a, Mizo a tizahawm dawn a, inhlan chhawn tlak ro min pe dawn a, Mizo ṭawng chhandamtu nih a tum," a ti a; Rini AI-in hma a sawn zel theih nan download-a hmang ṭheuh turin Mizo mipui a sáwm.

Inkhawmah hian Rini Speech AI siamtu Zoramthanga'n Rini AI-in a tih theih hrang hrang a sawifiah a; khualzahawm minister K Sapdanga'n thu a sawi bawk.