International Biodiversity Day hmang

Nimin May 22 kha International Day for Biodiversity a ni a, Mizoramah pawh hmun hrang hrangah hman a ni. Mizoram sorkar buatsaihin Assembly Annexe confe-rence hall-ah hman a ni a, Environment Forest & Climate Change minister Lalthansanga'n a hmanpui.

Biodiversity Day pual hian Mizoram EIACP Hub, Mizoram Pollution Control Board leh Reiek Branch YMA te ṭangho chuan nimin khan Reiek tlangah awareness programme an hmang. Biodiversity pawimawhna te, biodiversity chhe zel venhim a ṭul dante inhrilh a nih bakah, chhehvel venghim tura intiamna (pledge) thu sawi rual a ni a, Reiek tlânga bawlhhlawh ṭawih thei lote an thian fai nghal.

Assembly Annexe con-ference hall-a hmannaah minister Lalthansanga chuan, thing leh mau humhalh chungin hma-sawnna kalpui thiam a pawimawh thu a sawi a, "Ram dang aṭanga thing leh mau bakah, nungcha lak luh aiin a tualṭo humhalh a, enkawl thiam a pawimawh. Nungcha leh thil nung chi hrang hrang humhalhna hi mipui kuta innghat a ni a, sorkara agency te, zirchianna kalpuitu pawl te, tlawmngai pawlte leh tualchhung mipuite lungrual taka kan thawhho reng a ngai," a ti.

EFCC Minister chuan, ṭhalaite chu an chakna, ngaihtuahna leh an tumruhna chu nungcha leh thil nung chi hrang hrang humhalh nana hmang turin a chah a; sorkar ruahmanna (policy) mai ni lo, a taka ni tin nuna hmang tur leh nunpui tlat turin mi tin a chah bawk.

Mizoram State Biodiversity Board hmalaknain hmun hrang hrangah thil nung tinreng humhalh a, awmze neia chhawr ṭangkai tura inzirtir neih ṭhin a ni a; inkhawmah hian EFCC secretary Sudhir Kumar pawhin thil nung humhalh chungchang kal khawmte a hrilhfiah.

Kumina Interna-tional Biodiversity Day thupui chu 'Khaw-vela nghawng nei tura mahni awmhmun aṭanga chêt lak' (Acting locally for global impact) tih a ni.