Gas tichingpentu hrem a ni

Legal Metrology chuan thu an dawn bawhzuiin nimin khan eirawngbawlna gas (LPG) bûr 259 khawih chingpentu an hrem.

Sorkar thuchhuah tarlan danin, Zothan Gas Agency chuan an gas sem chhuah turah bûk tling lo a awm nia an rinhlelh chu Legal Metrology an hriattir a; Legal Metrology enforcement-in gas bûkna hmanga an endik hnuah bûr 306 zinga bûr 259 (84.64%) chu a nih tur ang a ni pha lo tih an hmu chhuak.

Gas bûr khawih chingpentu nia rinhlelh truck khalhtu Tera Moni (48), Ram Nagar, Silchar chu Legal Metrology Act, 2009 Section 30 tlawhchhanin hrem a ni a; gas bûr bûk tling lote chu thun khah ṭhat leh turin agency leh IOC lamin hma an lak a ngai dawn a ni.