KHAWTHLIR

Pentikos Ni

Naktuk Pathianni hi Thlarau Thianghlim thlen ni champha, Pentikos Ni a ni. Pentikos tih hi Grik ṭawng niin, 50-na tihna a ni a; Thuthlung Hlui hunah chuan Kalhlên Kût ṭiak ni aṭanga ni 50-naah hman a ni a, Thuthlung Thar hunah chuan Isua thawhleh tûk (easter) aṭanga ni 50-naah hman a ni. Pentikos Ni hi khawvel hmun hrang hrangah Kristiante'n an hmang ṭhin a; Mizorama kohhrante pawhin naktuk hian an hmang dawn a, kohhran ṭhen­khat chuan ruai nen an hmang dawn.

Meizial man

Legal Metrology enforcement chuan nimin khan Aizawl New Market-ah dan loa ram dang aṭanga lak luh meizial - V leh Farstar báwm 2,750 an man. Meizial an mante hi India siam meizialte anga chhiah an chawi ve loh avangin Legal Metrology (Packaged Commodities) Rules Section 6 tlawhchhanin man a ni.

CBCI Advisor

Catholic Bishops’ Conference of India (CBCI) chuan Jonathan Lalremruata, Durtlang Leitan chu kum 2026-27 chhunga official advisor to the CBCI atan an ruat a, Mizo zinga CBCI advisor hmasa ber a ni. CBCI advisor atana ruatna hi CBCI aiawhin Aizawl bishop Most Rev. Stephen Rotluanga'n May 21, Ningani khan Bishop House, Aizawlah a hlan. CBCI hi India rama Catholic inrêlbâwlna sang ber a ni.

Reservation duh

Ex Defence Service Officers & Widows Association, Mizoram chuan, Mizoram sorkarin ex-servicemen (personnel below officer ranks)-te tana sorkar hna group B, C & D-a reservation 5% a kalpui chu an lawm thu an tarlang. State sorkar dangte tih dan angin Defence officer pension-te tan pawh Mizoram sorkar hna lakah reservation siam ve ni se an duh thu an sawi bawk.

Bána Kaih inzirtir

Saitual additional DC Lallawmawma chuan nimin khan Chief Minister's Special Package Phase-II hnuaia progress partner atana thlan mi 12 hnenah certificate leh placard a hlan. Progress partner-te tan hian orientation training neih nghal a ni.