Lungleia department hmunte tlawh

Minister of state B Lalchhanzova chuan May 21, Ningani khan Lungleiah a department enkawl - Information, Public Relations, Printing & Stationery (IPRPS), Food, Civil Supplies & Consumer Affairs (FCSCA) leh Land Revenue & Settlement (LRS) department hmunte a tlawh a, thawktute nen department hmalakna leh thil pawimawhte an sawiho.

B Lalchhanzova chuan, Lunglawna Printing & Stationery ram chu District Court sakna atan Bar Association-te'n an dil thu leh indawrna a kal mek thu a sawi a, "Bar Association chuan Aizawlah Chief Minister leh kei pawh min rawn hmu tawh. Sorkar kalphungah chuan khawi hmun pawh ni se, ram leh mipui tana thil ṭha zawk a thlen theih dawn chuan department leh department karah ram inthleng te chu a thleng ṭhin a, Aizawl aṭanga 'a ṭha alawm' tih ngawt chi a nih loh avangin a hmunah ngei ka rawn en a ni," a ti.

Ram chu Bar Association hnenah sorkarin a hlan ngei ang tih a la awm loh thu sawiin Minister chuan, "Enho a, sawiho a, ngaihtuah zel a ni dawn. Chief Minister hnenah pawh a ṭul dan azirin report thehluh a ni ang," a ti a; sorkarin a duh ber chu khawi hmun pawh ni se, ram tana ṭha tur a nih chuan hlan phal mai tur tih a nih thu a sawi.

B Lalchhanzova chuan, department leh department inkarah kár âwl awm loa thawhhona ṭha neih zel a ṭul thu a sawi a; a department-a thawktute rilru leh ngaihtuahna a ṭâwmpui thu leh department tan leh ram tana ṭha ber tura hmalak zel a duh thu a sawi bawk.

Minister hi Lunglei HPC vice chairman V Malsawmtluanga, MLA, IPRPS secretary Betsy Zothanpari Sailo, District & Sessions judge R Lalduhawmi leh Bar Association Lunglei Sub-Headquarters president ZD Lalnunsanga ten an ṭawiawm.

B Lalchhanzova hian Lungleia DCSO office, Revenue office leh IPR office-te tlawh nghal a, thawktute nen mamawh leh ṭulte an sawiho a ni.