Myanmar aṭanga ran lutah fimkhur turin mipui chah

Siaha district magistrate VL Hruaizela Khiangte chuan thuchhuah siamin, Indo-Myanmar kaltlanga Mizorama ran ke natna (foot & mouth disease) lut thei lakah fimkhur turin district mipui a chah.

Siaha Bawrhsap chuan, Siaha district-a Myanmar ramri check post leh ran rawn luh theihna zawng zawngah ran rawn lutte chu a him leh him loh endik turin Vety doctor/field staff-te a hriattir a, "Border area-a ran rawn luhna khaw hmasa berah khawtlang hruaitute'n ran rawn lutte chu khaw danga an kal hma leh hri a darh zel loh nan an khuaah an lo dah hrang (quarantine) phawt tur a ni," a ti.

Foot & mouth disease chu bawng, sial, láwi, vawk, kel leh beram ten an kai theih thu leh, Myanmar aṭanga ran rawn lutte zinga hrisel ṭhate chu Vety doctor/field staff-te'n a hrisel ṭha tih fiahna (soundness certificate) pek tur a nih thu a tarlang bawk.