Hmarchhaka hmahruaituah Sorkarin Mizoram dah a tum - CM
Socio Economics Development Policy (SEDP) hnuaia Board hrang hrangte pisa chu nimin khan chief minister Zoramthanga'n a hawng. Pisa hawn puala inkhawm Assembly Annexe conference hall-a buatsaihah Chief Minister chuan, Mizoram chu hmasawnna kawng hrang hrangah India hmarchhaka hma hruaituah sorkarin dah a tum thu a sawi.
CM Zoramthanga chuan, board hrang hrang din a nih chhan sawiin, "Mizoram hi hmasawnna kawng hrang hrang - ei leh barah te, mipui nunphungahte leh hmasawnna policy kalphungahte India hmarchhaka hma hruaitua dah sorkarin a tum. Chumi atan chuan SEDP siamin, policy tipuitling tura hma la turin board 14 din a ni. SEDP hian a huam zau a, khawi lai bik emaw tan chauh ni loin, mi tin tan a ni," a ti.
SEDP chu bituk zat neia sum sem lam a nih loh thu sawiin Chief Minister chuan, "Sorkar laipuia sum tam tak awm hmang ṭangkai tura ruahmanna, hmasawnna tur hnathawh theih hrang hrangte project-ah siamin hmalak zel tur a ni," a ti a; board-te chu SEDP inkaihhruaina mila sorkarin policy a siamte tihlawhtling tura theihtawp chhuahtu tur an nih thu a sawi.
Mi tam takin board hrang hrang dina vice chairman-te minister of state rank-a dah a, board member-te ruat an nih chhan an zawh thu sawiin Zoramthanga chuan, "A chhan chu tute emaw kuta sorkar daha en tawp ni lo a, kan vaia kan sorkarna tur a ni. Mamawhnain min nawr chuan board dang pawh kan siam belh ang. A ṭhat lohna lai pawh a awm thei a, a awm a nih chuan kan siamṭha zel dawn," a ti.
Chief Minister chuan, mipuite rethei loa siam dan tur ngaihtuah a pawimawh thu sawiin, "Mipuite kum khata nuai 5-10 thar thei turin siam kan tum. Chumi tur chuan Pathianin ram ṭha tak min pek hi kan hmang ang. A buaithlak ber chu Delhi ho zirtir thiam hmasak an ngai a, an thiam sâwt khawp mai," a ti a; Mizoram chu khawizu leh hnute tui luanna ram, Kanan aia a lêt sawma a ṭhat zawk thu a sawi.
Tun hnaiah zirtirtu laka sawiselnate a awm thu sawiin CM Zorama chuan, "Zirtirtu lâk vel leh transfer vela buainate hi economics hmasawnnain a chinfel vek theih. Miin kum khata nuai 5-7 an lak luh a, school fee tur an neih chuan public school lo-ah an luhtir thei ang," a ti.
Board 14 vice chairman-te aiawha thu sawitu Dr ZR Thiamsanga, Health & Family Welfare Board vice chairman chuan, board-te chu pawimawh tak leh thil ti thei tak tura ruahman a nih thu a sawi. SEDP board-te pisa hawnna inkhawmah hian deputy chief minister Tawnluia, minister Dr R Lalthangliana, deputy speaker Lalrinawma, minister of state TJ Lalnuntluanga leh Robert Romawia Royte te pawh an tel.
Mizoram sorkar chuan SEDP hnuaiah board chi hrang 14 a din thar a, chairman chu a kaihhnawih minister-te niin, vice chairman atan MLA leh ex-MLA-te ruat an ni. Board tinah member eng emaw zat ruat an ni bawk.
Board vice chairman-te hian Secretariat Building Annex-II, Treasury Square-ah pisa an nei hlawm a ni.