Hmarchhak state 8 khawpuiah CAB dodalna lantir a ni dawn

North East Students' Organization (NESO) chuan, sorkar laipuiin tharthawha pass a tum, Citizenship Amendment Bill (CAB) an duh lohzia lantirna leh dodalna atan November 18, 2019-ah India hmarchhak state tin khawpuiah lungawi lohna an lantir dawn thu an puang.

NESO hian October 31, Ningani khan Guwahati-ah Executive Council meeting an nei a, NESO-a tel zirlai pawl hrang hrang - All Assam Students' Union (AASU), Twipra Students' Federation (TSF), All Arunachal Pradesh Students' Union (AAPSU), All Manipur Students' Union (AMSU), Khasi Students' Union (KSU), Garo Students' Union (GSU), Mizo Zirlai Pawl (MZP) leh Naga Students' Federation (NSF) aiawhte an tel.

NESO thuchhuah tarlan danin, meeting-ah hian India hmarchhak bial kaihhnawih thil hrang hrang - CAB, NRC, NEEPCO, NRL, ILP, zirna, ei leh bar, employment, mega dams leh thil dangte an ngaihtuah a ni. NESO thuchhuah chuan, Citizenship Amendment Bill dodal nan NESO-in November 18, 2019 khian hmarchhak state tin khawpui (capital)-ah lungawi lohna an lantir dawn thu a tarlang a, "CAB kan duh loh thu hi Prime Minister leh Home Minister hnenah hmarchhak state pariata Governor-te kaltlangin thehluh tum a ni bawk," a ti.