Aizawlah zanah lirthei endik a ni; Police-in mi 74 an man nghal

Aizawl Traffic Police chuan May 23, Inrinni zan khan Aizawla hmun hrang hrangah lirthei tlan vel an endik a, dan bawhchhia mi 74 an man.

Traffic Police Special Drive hi dan bawhchhiatna hrang hrang vanga Aizawl khawpui chhunga chetsualna thleng ṭhin tihtlemna atan leh mipui himna atana kalpui a ni a; Inrinni zan khan dar 9 hnu lam aṭangin hmun hrang hrangah lirthei an endik a, Pathianni zing khawvar dawn thlengin an endik a ni.

Special Drive-ah hian lirthei dan bawhchhiatna hrang hranga inhnamhnawih mi 74 zet man an ni a; chu'ngte chu - bike ri ring - 12, license nei loa lirthei khalh - 12, chak lutuk/hlauhawm taka khalh - pathum, rui chunga khalh - pali, helmet khum lo/wrongside-a tlan /tripple riding, leh dan bawhchhe dang - mi 43 an ni.

Aizawl Traffic Police Media Cell chuan, Special Drive chu a ṭul anga kalpui zel a nih dawn thu tarlangin, dan zawm kawnga ṭan la thar zel turin lirthei neitute leh khalhtute an chah a, Aizawl a him zawk theih nan ṭanhopuiah mipui an sáwm bawk.