PWD Minister-in Langkaih lei a hawng

Mizoram leh Tripura inrina, Kanhmun leh Damcherra inkar Langkaih lui chunga lei dawh thar chu May 22, 2026 tlai khan PWD minister Vanlalhlana'n a hawng.

Langkaih lei dawh hna hi Sadguru Engineers & Allied Services Private Limited-in March 27, 2018 khan an thawk ṭan a; lei dawhna atan NABARD (RIDF-XXIII) aṭangin loan cheng nuai 2,231.91 hmuh niin, agreement amount chu nuai 2,203.26 a ni.

PWD Minister chuan, Langkaih lei chu Kanhmun khua leh a chhehvel tan a pawimawh thu sawiin, hmuingilna thlengtu, sumdawnna kawngah hausakna thlentu leh Tripura state nena inpawh tak leh inngeih taka khawsakhona, inpumkhatna thlentu ni se a duh thu a sawi.

Langkaih lei leh Teirei lei hawng tura a kalnaah khawtlang hruaitute'n an mamawhte a hnenah an thlen thu sawiin Vanlalhlana chuan, "Mimal leh pawl tana hlâwkna lam tu mahin sawi lo a, kawngpui ṭha an duh thu deuh hlir an lo thlen. Khawtlang hruaitute'n chuti taka an vei inkalpawhna kawngpui ṭha chu sorkar pawhin theihtawp chhuahin pek ngei a tum dawn a ni," a ti.

Lei hawnnaah hian PWD Minister puitu MLA T Lalhlimpuia pawhin thu sawiin, "ZPM sorkar tirhah leiba tam tak nen bul ṭan ni mah se, kum hnih leh a chanve hun kan hman hnu chuan nasa takin hmasawnna kan hmu a ni," a ti a; May 22, 2026-a lei an hawn pahnih - Teirei lei leh Langkaih luite chu hun rei tak thawh a ni a, a taka hlawhtlinna ZPM sorkar hnua a thleng chu Pathian ruat nia a hriat thu a sawi.