Lungleia car chesualah mi 3 thi
May 23, Inrinni zan khan Lunglei leh Hauruang inkara Riangvaite Thlanmual bulah car a chesual a, mi pathum thiin, nimin tlai dar 5 thleng khan mi pahnih lak chhuah an ni tawh.
Lunglei Police aṭanga thu dawn danin, nimin chawhnu dar 1 vel khan Lunglei Police Station-ah Laltlanthangi, Hauruang-in FIR a thehlut a; a fapa K Lalhlimpuia (25) leh a ṭhianpa Jerry Lalnunfela (40) te Inrinni zan dar 7 vela Lungleia an kal chu an la haw loh thu leh an biak theih loh thu a tarlang.
Police-te chuan K Lalhlimpuia mobile phone an call aṭangin phone chu Hauruang aṭanga hla vak loah a awm tih hriat a ni a; police-te'n zawng zuiin, Hauruang thlen hma km. 3 vela hla Riangvaite Thlanmual bulah lirthei, Hyundai i10 MZ-02 A-5769 a chesual tih hmuh chhuah a ni a; feet 300 vel a lum a ni.
Lirthei chesuala chuangte zawn nghal niin, hmuh kim an ni tawh a, Hauruang khua vek an ni. Nimin tlai dar 4 thleng khan K Lalhlimpuia (25) s/o K Rammawia leh Jerry Lalnunfela (40) s/o Lalzuimawia te ruang lakchhuah niin, he thu ziah lai hian PC Lalrintluangi (24) d/o PC Zodingliana (L) ruang chu lakchhuah tuma beih mek a ni.