KHAWTHLIR

KṬP-in thisen pe

KṬP, Maubawk Bial chuan May 23, Inrinni khan Maubawk Sikul veng Kohhran hall-ah thisen pek an huaihawt a; Synod Hospital tan thisen unit 62 an pe a, petute mipa 49 leh hmeichhia 13 an ni.

Rangkachak man

Assam Rifles chuan May 22, 2027 zan dar 7 khan Chawnpui vengah dan loa kawl nia hriat rangkachak tlang pakhat, gram 104 (carat 22) an man a, a kawltu Saidingliana (35), Zotlang, Aizawl an man nghal bawk. AR hian rangkachak hi Saidingliana'n mi dang hnena hlan tuma scooter-a a phurh laiin an man a; rangkachak leh a kawltu hi Customs hnenah an hlan a ni.

Chawlh thlâk

Mizoram sorkar calendar-ah May 27, 2026 chu Id-Ul-Zuha niin, sorkar chawlh a ni a, mahse, Id-Ul-Zuha hi May 28, 2026-ah hman a nih zawk dawn avangin sorkar chuan May 28 chu chawlhah a puang. May 27 chu calendar-ah chawlh anga tarlan ni mah se, chawlh a ni dawn lo.

Zirlai lawmpui

College Veng Branch YMA chuan May 22, 2026 zan khan College Veng Presbyterian Kohhran Hall-ah an venga zirlai hlawhtlingte chawimawina hun an hmang a, bialtu corporator R Lalawmpuii, Aizawl deputy mayor-in a hmanpui. MPSC Combined Competitive Examination 2025-a an veng mi tling leh HSSLC leh HSLC zo tharte hnenah lawmpuina an hlan a ni.

Bawlhhawlh báwm sem

Lunglei Municipal Council (LMC) huam chhung in tina sem tur bawlhhlawh bawm chu LMC chairman Lalzuithanga'n May 22, 2026 khan Lunglei Convention Centre aṭangin a vailiam a; May 23, Inrinni khan Sazaikawn leh Hauruangah sem a ni. Lalzuithanga chuan, LMC-in hmalakna a neih zingah bawlhhlawh sawngbawl chu a pawimawh ber zinga mi a nih thu a sawi a, "Hemi atana pawimawh tak bawlhhlawh bawm sem theih a ni ta hi a lawmawm tak zet a, mipuite'n faina kawnga rahbi thar kaina atan ṭangkai taka kan hman ṭheuh ka beisei," a ti.