Pawl hnenah oxygen concentrator hlan

India Formosa Foundation leh Central YMA hmalaknain May 23, Inrinni khan Vanapa Hall-ah YMA group leh branch hrang hrang bakah, YLA, MTP leh Assam Rifles te hnenah oxygen concentrator 500 hlan a ni a; chief minister Lalduhoma'n a hmanpui.

Oxygen concentrator hi India Formosa Foundation-in an pek a ni a; Mizoram bakah Assam, Tripura leh Manipur-a YMA group leh branch thlan chhuah 473-te leh, Young Lai Association, Mara Thyutlia Py leh Assam Rifles te hnenah 27 pek a ni.

CM Lalduhoma chuan, CYMA leh Formosa Foundation ten oxygen concentrator 500 an sem chu oxygen mamawh damlote'n ṭangkai taka an hman tur a nih thu a sawi a, "Nun chhanhimna hmanraw pawimawh a ni a, a mamawhte'n an ban phak tura ruahmanna siam a ni hi a hluin, mi dangte tana malsawmna a ni," a ti.

Mizoramin harsatna a tawh lian ber chu ruihhlo a nih thu sawiin Lalduhoma chuan, "Ruihhlo hian min kiansan se chuan Mizoram hian harsatna kan ngah vak hmel loh. Indopui kan puang a, he thil kan beihnaah hian kan ṭan a ngai," a ti a; tlawmngai pawlte chu theihtawp chhuah a, ruihhlo donaah thâ thlah lo turin a ngen.

CYMA president R Lalngheta pawhin thu sawiin, hmun hrang hranga YMA hruaitute chu ruihhlo do turin a chah a, "YMA-in ruihhlo lakah indo kan puang a, dawizep takin ruihhlo i do lo ang u. A ṭul chuan kan ram leh hnam chhan nan kan tuar ngam a ṭul. Mahni ṭánghma sialna vanga ruihhlo zuar ṭâng ṭângte hi i dîm lo ang u," a ti.