Appointment/agreement letter tifel loa Chennai-a kal lo turin Mizo mipui ngen

Chennai Mizo Welfare Association (CMWA) chuan thuchhuah siamin, agency-te’n hna an hmuhsakah appointment/agreement letter tihfel vek a nih loh chuan kaltir lo turin Mizo mipui an ngen.

CMWA chuan, "Agency-te’n hna an hmuhsakte appointment/agreement letter tihfel vek a nih loh chuan kaltir lo turin kan inngen. Agency anga awma phaia hnathawk tur hna hmuhsaktute hian an hna awmna hmuhsakte aṭangin commission an la ṭhin. Hna an hmuhsak, hlawh lak theih loh leh an tiam anga hlawh (salary) leh awmna (accomodation) lo ni si lo, agency-te'n an buaipui zui loh tunlaiah CMWA-in a buaipui eng emaw zat an awm," an ti a; agency/mimal social media-a hna awm post ṭhinte lakah fimkhur turin mipui an chah.

Hna thawk turte’n appointment/agreement letter siam ngei tur a nih thu sawiin CMWA chuan, "An thawhna turte nen appointment/aggrement letter siam hmasa lo chuan hna zawm lo turin kan ngen. Hlawh la thei lo, a huna hlawh dawng lo hi agreement fel tak a awm loh chuan buaipui a harsa ṭhin," an ti.

CMWA chuan hna thawk tur emaw, thil zir tur emawa Chennai-a kalte leh kal turte chu voter identity card, Aadhaar card, driving licence, leh document pawimawh dangte a soft copy nen nei turin an chah a; bank account mumal tak nei a, internet banking felfai taka thlun zawm sa nei vek turin an chah bawk.

Chennai-ah chhungte hriatpuina leh remtihna loa kal lo turin Mizo mipui an chah a, "Kan hna zawm tur leh thawhna tur address kimchang takin kan chhungte kan hrilh ngei ngei tur a ni," an ti.