KHAWTHLIR

Baptist Church of Mizoram (BCM), Thenzawl Venghlun Kohhran thar leh an biak-in thar chu nimin khan BCM general secretary Rev. F Ramdinmawia'n Pa­thian hnenah hlanin a hawng. Thenzawl bialtu BCM pastor Rev. David Lalmalsawma Sailo sawi danin, Thenzawl Venghlun BCM kohhranah hian chhungkua 44 leh member 190 an awm. Thenzawl aṭanga thu dawn danin, Thenzawlah hian kohhran pawl hrang pakua a awm a, BCM Thenzawl Venghlun biak-in hi Thenzawla biak-in 40-na a ni a, Police Training School-ah Hindu temple pakhat a awm bawk.

Fisheries department director C Laldawngliana chu October 31, 2019 khan superannuation pension-in a chhuak a, joint director F Vanlallawma chu nimin khan director-ah a kai sang ve nghal. Joint director-ah Laltleipuii leh deputy director-ah Lalrochhara te an kai sang bawk.

ZOHANDCO Board chu din thar a nih leh hnua a vawi khat nan nimin khan an pisaah an ṭhukhawm a, chairman C Lalrammawia'n a kaihruai. Meeting-ah hian agenda hrang hrang ngaihtuah a ni a, ZOHANDCO tluang leh hlawhtling taka a kal theihna turin action plan leh business plan an siamte an enho bawk.

BJP, Mizoram general secretary Vanlalhmuaka chuan, MADC chhung Tokalo biala MDC by-election neih zawh tâkah BJP candidate M Laikaw-a'n vote 155-a hnehna a chang thei chu lawmawm an tih thu a sawi a, "Amah thlang tlingtu Tokalo bial mipui hnenah lawmthu kan sawi tak meuh a ni," a ti.

Lawngtlai West bialtu MLA C Ngunlianchunga chuan nimin khan a bial chhunga hmasawnna hnathawh mek Eklavya Model Residential School leh 3rd IR Bn. hmun tur siam mek leh Lawngtlai-III a kawng chhiatna laite a enfiah. C Ngunlianchunga chuan Eklavya Model Residential School sak meka hmanraw ṭhenkhat a bikin an balu hman chu duhthu a sam loh thu a sawi.